Shia Link Nauhe: Shadman Raza (2018)

Baba, baba, baba mere baba..(2)
aye baba, mai kaise jiyu, is duniya mein tere bina..(2)

1. Naazo ki pali bacchi par
ye kaisi qayamat aayi
ghurbat ke ghane jangal mein
hai ghere hue tanhayi
baba hi rahe na bhai
aye baba...

2. Ek tashna dahan shehzadi
hai sola(16) peher ki pyaasi
haal apna sunaye kisko
ab koi nahi hai baaqi
maqtal mein hui faryadi
aye baba...

3. Hai charo taraf tanhai
hai charo taraf veerana
rota hai meri haalat par
ye jangal ye veerana
mai kaise rahungi tanha
aye baba...

4. Shabbir ki raaj dulari
kis haal mein hai bechari
maqtal mein khadi ro ro kar
kehti hai ghamo ki maari
mar jayegi meri pyaari
aye baba...

5. Durr cheen liye aada ne
kaano se lahu behta hai
jaana hai mujhe zinda'n mein
har ek laee'n kehta hai
ye khauf mujhe rehta hai
aye baba...

6. Wo raat jaha'n ronak thi
veeran hai ab wo khaime
has haske sitamgaro ne
maare hai tamache mere
roka na kisi ne aake
aye baba...
Baba, baba, baba mere baba

Bhai abbas, bhai abbas..(4)
Haaye..
Qatl karne ke iraade se, sitamgar jo badha
hogayi dasht e bayabaan ki, khamosh fiza
paas aaya to qayamat ka ye manzar dekha
sajda e shukr mein sar rakhe hue shaah e huda
bhai abbas ko dete the sadaa...(2)
bhai abbas ko dete the sadaa...(4)

zarb jab lagti thi tab shah e huda
bhai abbas ko dete the sadaa...(3)

tan se sar hota tha jis waqt juda
bhai abbas ko dete the sadaa...(3)

1. Jaanta tha ke shahe jinno bashar pyaase hai
jumbishe lab se ye lagta tha ke kuch kehte hai
shimr ne kaan lagakar jo suna
bhai abbas ko dete the sadaa...(3)

2. Aisa bhai bhi zamane mein na dekha na suna
bhai ko jisne tahe teghe sitam yaad kiya
har mu'arrikh ne likha shah e huda
bhai abbas ko dete the sadaa...(3)

3. Waar jis waqt kiya karta tha gardan pe laee'n
kaanp jaata tha falak hilti thi maqtal ki zamee'n
jab bhi shabbir ka kat-ta tha gala
bhai abbas ko dete the sadaa...(3)

4. Aah karte the na faryaad o buka karte the
koi shikwa, na shikayat, na gila karte the
ummat e aas ko dete the dua
bhai abbas ko dete the sadaa...(3)

5. Binte haider jo nazar aayi dar e khaima par
mai abhi zinda hu zainab ye pukare sarwar
baad az sibt e rasool e dosara
bhai abbas ko dete the sadaa...(3)

6. Pehli che(6) zarbo mein..
Pehli che(6) zarbo mein har ek ko kiya yaad magar
phir na ghazi ke siwa aaya koi bhi lab par
hogaya hone ko sar tan se juda
bhai abbas ko dete the sadaa...(3)

7. Aakhri zarb jo zalim ne lagayi asif
hogayi sheh ke tan o sar mein judayi asif
shadma'n tab bhi shah e karbobala
bhai abbas ko dete the sadaa...(3)

Labbaik ya hussain..(2)
Hussain ka ghum manane walo
hussain tumko bula rahe hai

suno suno aye zamane walo
hussain tumko bula rahe hai

Hussain ka ghum manane walo
hussain tumko bula rahe hai

1. Yehi to hai intezaar e mehdi
sada e halmin ka hai ye matlab..(2)
wafa e abbas mein bano tum
mahafizan e mazar e zainab..(2)
wafa ka parcham uthane walo..(2)
hussain tumko bula rahe hai

2. Azeem hurr tha ke jisne akhir
hussain par jaan apni di hai..(2)
kabhi ye socha hai zakiro ne
kabhi ye awaaz bhi suni hai..(2)
ke zikr hurr ka sunane walo..(2)
hussain tumko bula rahe hai

3. Jo khaibar e waqt mein ladoge
to karbala se na hogi doori..(2)
jaha'n bhi mazloom pis rahe hai
waha' pe imdaad hai zaruri..(2)
ali ke naare lagane walo..(2)
hussain tumko bula rahe hai

4. Yehi to maqsood e karbala hai
ke imtehan e wafa yehi hai..(2)
hai mil chuke tumko sab wasael
magar irade mein kuch kami hai..(2)
ziyarato pe na jaane walo
hussain tumko bula rahe hai

5. Jo ibn e zehra pe jaan denge
unhi ke honge bade muqaddar..(2)
zohair qain aaenge yaqeenan
kaha hai zaujaan e aage badhkar..(2)
chalo chalo aye zamane walo..(2)
hussain tumko bula rahe hai

6. Jo al ajal ki sada lagaye
wo apna qirdaar bhi dikhaye..(2)
imam e mehdi ke hai jo nasir
habib ibn e mazahir aaye..(2)
ke dosti ko nibhane walo..(2)
hussain tumko bula rahe hai

7. Yehi to paigham e karbala hai
hai nusrato ka sawaal laazim..(2)
ke nasiro ke liye raha hai
hamesha rizq e halaal lazim..(2)
halaal rozi kamane walo..(2)
hussain tumko bula rahe hai

8. Namaz ko chhod dene walo
imam ka saamna karoge..(2)
amal ke baare mein kya kahoge
hussain ko kya jawaab doge..(2)
ghina ki mehfil sajane walo..(2)
hussain tumko bula rahe hai

9. Ghira hua hai jo lashkaro mein
imam e daura'n bula raha hai..(2)
suna hai jab se ye isteghasa
sagheer jhule se gir gaya hai..(2)
ke teer par muskurane walo..(2)
hussain tumko bula rahe hai

10. Ma'ashre mein madad karo tum
yateem mazloom mar raha hai..(2)
qamar baseerat ki aankh kholo
yehi kahi par hi karbala hai..(2)
juloos o majlis mein jaane walo..(2)
hussain tumko bula rahe hai

Labbaik ya hussain..(2)

Pukaro aise ke mera imam aajaye..(2)
mera bhi lashkar e mehdi mein naam aajaye
pukaro aise ke mera imam aajaye..(2)

1. Wilaye haq mein jihad e ghulam jaari hai
faraaz e daar pe meesam ka kaam jaari hai
zubaan kat gayi lekin kalaam jaari hai
dua karo hame tarze kalaam aajaye
pukaro aise ke mera imam aajaye..(2)

2. Karaar ke liye hai beqaraar pehle se
dare imam pe hai janesaar pehle se
bohot hai bheed banalo qataar pehle se
chalo chalo ke ghulamo mein naam aajaye
pukaro aise ke mera imam aajaye..(2)

3. Koi to raahe shahadat pe chalne wala hai
hai koi hurr ki tarha jo sambhalne wala hai
zara si der mein suraj nikalne wala hai
palak jhapakne mein unka payaam aajaye
pukaro aise ke mera imam aajaye..(2)

4. Amal se door hai duniya ki chaah ghalib hai
jo haal hai yehi kehna yaha munasib hai
imaam to nahi ghayab, awaam ghayab hai
imaam aayenge pehle awaam aajaye
pukaro aise ke mera imam aajaye..(2)

5. Qadam imam e zama'n ka rahe sabaat mein hai
ali ki tegh hai qur'aan unke saath mein hai
nizaam e adl imaam e zama'n ke haath mein hai
hamare mulk mein bhi wo nizaam aajaye
pukaro aise ke mera imam aajaye..(2)

6. Imam e asr se milne ki jaa hai farshe azaa
namaaz padhke har ek maang le alam pe dua
jise bhi karni hai karle ziyarate maula
jo majliso mein basad ehteraam aajaye
pukaro aise ke mera imam aajaye..(2)

7. Husaini maao ne qirdaar inka daala hai
payaam e karbobala ne inhe sambhala hai
imam ke liye baccho ko maine paala hai
mera ye lakht e jigar unke kaam aajaye
pukaro aise ke mera imam aajaye..(2)

8. Fida e asghar e besheer aaj hona hai
wila e akbar e mehru ne barchiya kyaein
khuda ki raah mein hum bhi shaheed hojaye
hamare haath mein kausar ka jaam aajaye
pukaro aise ke mera imam aajaye..(2)

Tadap kar sayyad e sajjad roye
haaye...
dafn karne ke liye laash shahidan e wafa
karbala aaye ba aijaz e imamat maula
chaar su bikhre hue tukdo ko jis dum dekha
phatt gaya qalbo jigar zabt ka yaara na raha
lehed mein laasha e abbas rakh kar..(2)
tadap kar sayyad e sajjad roye

lehed mein laasha e abbas rakh kar
tadap kar sayyad e sajjad roye

Nigaaho'n mein tha aashura ka manzar
tadap kar sayyad e sajjad roye

lehed mein laasha e abbas rakh kar
tadap kar sayyad e sajjad roye

1. Kabhi laashe ke tukde choomte the
kabhi abbas ka sarr dhundhte the
tane besar ko seene se laga kar
tadap kar sayyad e sajjad roye

2. Shikasta jism ke bosida shaane
uthaye kis tarha allah jaane
chala jab qalb par furqat ka khanjar
tadap kar sayyad e sajjad roye

3. Sitam fauj e sitamgar dhaa rahi hai
sakina bhi tamache khaa rahi hai
chacha abbas se ye baat keh kar
tadap kar sayyad e sajjad roye

4. Jidhar le jaa rahe hai jaa raha hu
musalsal taaziyane khaa raha hu
taras khate nahi mujhpar sitamgar
tadap kar sayyad e sajjad roye

5. Badan par zakhm jitne the dikhaye
hue hai zulm kya kya sab bataye
bataya hai phuphi amma khule sar
tadap kar sayyad e sajjad roye

6. Chacha ki laash ko ek aah bhar ke
bohot roye supurde khaak karke
bohot choti si ek turbat bana kar
tadap kar sayyad e sajjad roye

7.Mukammal hogaya jis dum dafeena
kiya talkeen mein zikr e sakina
bataya chhin gaye kaano se gauhar
tadap kar sayyad e sajjad roye

8. Kabhi darya kabhi turbat ko dekha
kabhi nazdeek se ghurbat ko dekha
sare maqtal tarayi se palat kar
tadap kar sayyad e sajjad roye

9. Dua maango ye asif sidq e dil se
koi dushman bhi aise din na dekhe
ke jaise shadma'n haatho ko malkar
tadap kar sayyad e sajjad roye

Haye abbas alamdaar..(2)
thaame hai alam, khoon mein dooba hai alamdaar..(2)

Narghe mein laeeno ke akela hai alamdaar
thaame hai alam, khoon mein dooba hai alamdaar..(2)

1. Ab kaise sakina ko mai pohchaunga paani..(2)
bus baat yehi sochke rota hai alamdaar
thaame hai alam..

2. Duniya meri andher hai aye bhai tere baad..(2)
tu hi meri aankho ka ujala hai alamdaar
thaame hai alam..

3. Kya hogaya sab tera badan teero se chhalni..(2)
kyu khoo'n mein bhara tera pharera hai alamdaar
thaame hai alam..

4. Thi sheh ki sada koi use dede sahara..(2)
be dast hai rehwaar se girta hai alamdaar
thaame hai alam..

5. Ek shor qayamat ka tha sab ehle haram mein..(2)
jab tera alam khaime mein aaya hai alamdaar
thaame hai alam..

6. Dil thaam ke roti hi rahi raahe sitam mein..(2)
zainab ko bohot yaad tu aaya hai alamdaar
thaame hai alam..

7. Jab jab bhi lage baali sakina ko tamache..(2)
har baar sakina ne pukara hai alamdaar
thaame hai alam..

8. Zindaan mein darr lagta hai kehti thi sakina..(2)
jab bhi ye sada aayi hai tadpa hai alamdaar
thaame hai alam..

9. Izhaar wohi hashr ke din shadma'n hoga..(2)
jiske bhi labo'n par tera nauha hai alamdaar
thaame hai alam..

Haye ghurbat e shabbir
Abbas ke marne se..(2)
tooti hai kamar sheh ki
veeran hui duniya akbar tere marne se..(3)

1. Kya tujhko khabar akbar jo guzri hai madar par..(2)
ek barchhi ka phal tere seene mein utarne se

2. Aa jate the pehle to tum ek sada par hi..(2)
aate nahi ab maa ke faryaad bhi karne se

3. Kis haal mein sughra ko tum chhod gaye akbar..(2)
fursat hi nahi milti aahein use bharne se

4. Jab dekha sar e akbar laila ne kaha rokar..(2)
aye kaash mai mar jaati pehle tere marne se

5. Kya dard ka aalam hai har laash tadapti hai..(2)
maa behen ke be parda maqtal se guzarne se

6. Ek laasha tarayi mein uth-ta kabhi girta tha..(2)
shabbir ke maqtal mein uthne kabhi girne se

7. Binayi chini sheh ki izhaar sare maqtal..(2)
ham shakl e payambar ke duniya se guzarne se
veeran hui duniya akbar tere marne se..(2)